මේ වසරේ මුල් මාස හතර තුළදී විදේශගත ශ්‍රමිකයන් අමෙරිකානු ඩොලර් බිලියන 1.8 ඉක්මවූ විදේශ ප්‍රේෂණ ප්‍රමාණයක් ශ්‍රී ලංකාවට යවා ඇතැයි ශ්‍රී ලංකා විදේශ සේවා නියුක්ති කාර්යාංශය සඳහන් කළේ ය.
ඒ අනුව මේ වසරේ පළමු මාස හතර තුළදී විදේශගත ශ්‍රමිකයන් අමෙරිකානු ඩොලර් මිලියන 1867.2ක් ලංකාවට යවා ඇතැයි එම කාර්යාංශය පැවසීය.
අප්‍රේල් මාසය තුළදී පමණක් ඩොලර් මිලියන 454ක් යවා තිබෙන බවත් එය පසුගිය වසරේ අප්‍රේල් මාසය සමග සංසන්දනය කර බලන විට 82.4%ක ඉහළ යාමක් බවත් විදේශ සේවා නියුක්ති කාර්යාංශය සඳහන් කළේය.
මේ වසරේ ජනවාරි මාසයේදී විදේශගත ශ්‍රමිකයන් ඩොලර් මිලියන 427.5ක මුදලක් යවා තිබෙන බවත්, එය 68.8%ක වර්ධනයක් බවත්,
පෙබරවාරි මාසයේදී විදේශගත ශ්‍රමිකයන් ඩොලර් මිලියන 407.4ක් යවා ඇති බවත්, පසුගිය වසරේ පෙබරවාරි මාසයට සාපේක්ෂව එය 98.6%ක වර්ධනයක් බවත්,
පසුගිය මාර්තු මාසයේදී විදේශගත ශ්‍රමිකයන් ඩොලර් මිලියන 568.3ක මුදලක් යවා තිබෙන බවත්, එය පසුගිය වසරට සාපේක්ෂව 78.5%ක වර්ධනයක් බවත් එම කාර්යාංශය පැවසීය.
නීත්‍යානුකූල ක්‍රම හරහා ශ්‍රී ලංකාවට මුදල් යවනු ලබන විදේශගත ශ්‍රමිකයන් සඳහා වාහන ආනයන බලපත්‍ර ලබා දීමටත් ගුවන්තොටුපොළේදී ලබාදෙන තීරු බදු සහනය ඉහළ දැමීමටත් මේ වන විට පියවර ගෙන ඇතැයි ද ශ්‍රී ලංකා විදේශ සේවා නියුක්ති කාර්යාංශය සඳහන් කළේ ය.
