එක්සත් අරාබි එමීර් රාජ්‍යයේ නව අනිවාර්ය විරැකියා රක්ෂණ යෝජනා ක්‍රමයට දායක වීම සඳහා අවසන් දිනය ජූනි 30 දා ලෙස කලින් නිවේදනය කොට තිබුණත් එම කාලසීමාව 2023 ඔක්තෝබර් 1 දක්වා දීර්ඝ කරන ලදි.
සේවකයින්ට ලියාපදිංචි වීමට වැඩි කාලයක් ලබා දීම සඳහා අවසාන දිනය මාස තුනකින් දීර්ඝ කරන ලදී. මානව සම්පත් සහ එමරාතීකරණ අමාත්‍යාංශයට (MoHRE) අනුව, එක්සත් අරාබි එමීර් රාජ්‍යයේ පුරවැසියන්ට සහ පදිංචිකරුවන්ට දඩ මුදල් වළක්වා ගැනීම සඳහා රක්ෂණ ක්‍රමය සඳහා ලියාපදිංචි වීමට 2023 ඔක්තෝබර් 1 දක්වා කාලය තිබේ.
විරැකියා රක්ෂණ යෝජනා ක්‍රමය (ILOE) යනු, කම්කරුවන්ට තම රැකියාව අහිමි වුවහොත් මාස තුනක් දක්වා වන්දි මුදලක් ලබා දෙන සමාජ ආරක්ෂණ ක්‍රමවේදයකි.
විරැකියා රක්ෂණ යෝජනා ක්‍රමය (ILOE) 2023 ජනවාරි පළමුවෙනිදා සිට ක්‍රියාත්මක වූ අතර මාස හයක සහන කාලය 2023 ජූනි 30 දක්වා වීමට නියමිතව තිබූ අතර එය දැන් 2023 ඔක්තෝබර් 1 දක්වා දීර්ඝ කර ඇත.
ඩුබායි ඉන්ෂුවරන්ස් වෙබ් අඩවියට අනුව, මෙම යෝජනා ක්‍රමය පුද්ගලික සහ රාජ්‍ය අංශයේ සියලුම එමරාති ජාතිකයින් සහ විදේශීය සේවකයින් සඳහා අදාළ වේ. නිදහස් කලාපවල සේවය කරන සේවකයින්ට ඩුබායි ඉන්ෂුවරන්ස් වෙබ් අඩවියේ “Non-Registered in MOHRE” මත ක්ලික් කිරීමෙන් ලියාපදිංචි විය හැක.
ILOE යෝජනා ක්‍රමය සඳහා අයදුම් කරන ආකාරය
සියලුම සුදුසුකම් ලත් සේවකයින්ට ඩුබායි ඉන්ෂුවරන්ස් වෙබ් අඩවි ද්වාරය ඇතුළු නාලිකා හතක් හරහා හෝ ඔවුන්ට ළඟම ඇති අල් අන්සාරි මුදල් හුවමාරු මධ්‍යස්ථානයකට හෝ රජයේ ව්‍යාපාරික මධ්‍යස්ථානවලට (Tawjeeh or Tasheel) පිවිසීමෙන් දායක විය හැක. ඔබේ Emirates ID අංකය සහ UAE ජංගම දුරකථන අංකය ඔබ ළඟ ඇති බවට වග බලා ගතයුතුය.
විරැකියා රක්ෂණ යෝජනා ක්‍රමයට වැය වන මුදල
A කාණ්ඩය: ඩිරාම් 16,000 ක් හෝ ඊට අඩු මූලික වැටුපක් ඇති සේවකයන්ට ඩිරාම් 5ක මාසික රක්ෂණ වාරිකයක් ගෙවීමට අවශ්‍ය වනු ඇත, එනම් වාර්ෂිකව ඩිරාම් 60කි.
B කාණ්ඩය: ඩිරාම් 16,000 ඉක්මවන මූලික වැටුපක් ඇති අයට මසකට ඩිරාම් 10කි, එනම් ඩිරාම් 120 ක් වාර්ෂිකව ගෙවීමට සිදුවේ.
සේවකයින්ට මාසිකව, කාර්තුමය, අර්ධ වාර්ෂික හෝ වාර්ෂික පදනමින් වාරික ගෙවීමට තෝරා ගත හැකිය. ප්‍රතිලාභ ලබා ගැනීම සඳහා සේවකයින් අවම වශයෙන් අඛණ්ඩව මාස 12ක් සඳහා මාසික වාරිකය ගෙවා තිබිය යුතුය.
වන්දි මුදල
පුද්ගලයාගේ වැටුප මත පදනම්ව වන්දි ගණනය කරනු ලැබේ. එය විරැකියාවේ දින සිට මාස තුනකට නොවැඩි කාලයක් සඳහා ගෙවනු ලැබේ. වන්දි මුදල සේවකයාගේ වැටුපෙන් 60% ක් දක්වා ගණනය කෙරේ.
දඩය
2022 අංක 97 දරන කැබිනට් යෝජනාවට අනුව, එක්සත් අරාබි එමීර් රාජ්‍යයේ විරැකියා රක්‍ෂණයට ඔක්තෝබර් 1 වැනිදා වන විට දායක වීමට අපොහොසත් වන එක්සත් අරාබි එමීර් රාජ්‍යයේ සේවකයින්ට අමාත්‍යාංශය විසින් පනවන ලද ඩිරාම් 400 ක දඩයක් හෝ රක්ෂිතයා මාස තුනකට වැඩි කාලයක් සඳහා නියමිත රක්ෂණ වාරික ගෙවීමට අපොහොසත් වුවහොත් ඩිරාම් 200ක දඩයක් ගෙවීමට සිදුවනු ඇත.
