76 වන ජාතික නිදහස් දින සැමරුම් උළෙල කොළඹ ගාලු මුවදොර පරිශ්‍රයේදී මේ වන විට ආරම්භ වී තිබේ.” හදමු අලුත් රටක් ” යන්න මෙවර සැමරුම් උළෙලේ තේමාව වේ.
ජනාධිපති රනිල් වික්‍රමසිංහ මහතාගේ සම්ප්‍රාප්තියත් සමඟ උත්සවයේ සෙසු කටයුතු ආරම්භ විය.
මෙවර නිදහස් උළෙලේ ප්‍රධාන ආරාධිතයා ලෙස තායිලන්ත අග්‍රාමාත්‍ය ස්‍රෙතා තැවිසින් මහතා සහභාගී වේ.
ජනාධිපති කාර්යාලයීය නිලධාරින්ගේ සහභාගිත්වයෙන්, ජනාධිපති කාර්යාලය ඉදිරිපිට පිහිටුවා ඇති නිදහස් සටනේ ජාතික විරු ප්‍රතිමා අබියස පුෂ්පෝපහාර පිරිනැමීම අද උදෑසන 6.30ට සිදු විය.
මෙවර ආචාර පෙළපාළිය සඳහා ශ්‍රී ලංකා යුද හමුදාවේ සාමාජිකයන් 3042ක්, සන්නද්ධ රථ 77ක්, ශ්‍රී ලංකා නාවික හමුදාවේ සාමාජිකයන් 917ක්, සන්නද්ධ රථ 7ක්, ශ්‍රී ලංකා ගුවන් හමුදාවේ සාමාජිකයන් 605ක් සන්නද්ධ රථ 27ක්, ශ්‍රී ලංකා පොලිසියේ සාමාජිකයන් 299ක්, ශ්‍රී ලංකා පොලිස් විශේෂ කාර්ය බළකායේ සාමාජිකයන් 209ක්, සිවිල් ආරක්ෂක බළකායේ සාමාජිකයන් 379ක්, ජාතික ශිෂ්‍යභට බළකායේ සාමාජිකයන් 500ක්, විශ්‍රාමික නිලධාරින් 22ක්, ආබාධිත නිලධාරීන් 29කින් සමන්විත වේ.
නිදහස් දින බෞද්ධ ආගමික වතාවත් කොල්ලුපිටිය ධර්මකීර්තිරාමයේදී පැවැත් වූ අතර හින්දු ආගමික වතාවත් කොළඹ 4 වජිරා පිල්ලයාන් කෝවිලේදී සිදු කෙරිණ. බොරැල්ලේ පිහිටි සියලු ශාන්තුවරයන්ගේ දේවස්ථානයේදී කතෝලික ආගමික වතාවන් සිදු විය. ක්‍රිස්තියානි ආගමික වතාවන් කොළඹ 3 ක්‍රිස්තියානි රෙපරමාදු දේවස්ථානයේදී සිදු වූ අතර ඉස්ලාම් ආගමික වතාවත් කොළඹ 11, ජම්-උල්-අල්ෆර් මුස්ලිම් දේවස්ථානය එනම් රතු පල්ලියේදී සිදු කිරීමට කටයුතු සැලසුම් කර තිබුණි.
අද කොළඹ පැවැත්වෙන නිදහස් සැමරුම් උළෙලට සමගාමීව සෑම දිස්ත්‍රික් ලේකම් කොට්ඨාසයකම , ප්‍රාදේශීය ලේකම් කොට්ඨාසයකම සහ ග්‍රාම නිලධාරී කොට්ඨාසයකම වැඩසටහන් රැසක් සංවිධාන කර තිබෙන බවද සඳහන් ය.
