බදු ගෙවන පිරිසට ගෙදර සිටම බදු ගෙවිය හැකි ඩිජිටල් ක්‍රමයකට රාජ්‍ය සේවය ගෙනයන බව ජනාධිපති අනුර දිසානායක මහතා සඳහන් කරයි.
උප්පැන්න සහතිකය, මරණ සහතිකය, ඉඩම් ඔප්පු පිටපත, හැඳුනුම්පත ආදිය ගැනීමට රස්තියාදු වෙන ක්‍රමය අවසන් කර ඩිජිටල්කරණයකට ශ්‍රී ලංකාවම ලක් කරන බව ඔහු කියා සිටියේය.
ජාතික ජන බලවේගයේ මහ මැතිවරණ ප‍්‍රචාරක රැළියක් හෝමාගමදී අමතමින් ඔහු මෙසේ සඳහන් කලේය.
‘අපිට සාම්ප්‍රදායික ලෙස ඉස්සරහට යන්න බැහැ. බස් එකක ටිකට් එකක් ගන්න, පෝලිමේ ඉඳලා ටිකට් එකක් ගන්න, තැපැල් කන්තෝරුවේ පෝලිමේ ඉඳලා පැන්ෂන් එක ගන්න, උප්පැන්න සහතිකයක්, මරණ සහතිකයක් ගන්න රස්තියාදු වෙන ක්‍රමය, ඉඩම් ඔප්පුවේ කොපියක් ලබාගන්න, අයිඩන්ටියක් ලබාගන්න දැන් තිබෙන්නේ පැරණි ක්‍රම.
අපි මේවා කාර්යක්ෂමභාවයට ගේන්න ඕනෑ. බදු ගෙවන අයට ගෙදර සිට බදු ගෙවන්න, මේ සියල්ල ඩිජිටල් ක්‍රමයට ලක්කරනවා. ඒක ජාතික ජන බලවේගයේ ආණ්ඩුවේ ප්‍රමුඛතම කාර්ය බවට පත්කරනවා.
ඒ ක්ෂේත්‍රයේ ලංකාවේ ඉන්න අත්දැකීම් සහිත, ඒ ක්ෂේත්‍රය පිළිබඳ විද්වතෙක්, විශාල වැටුපක් ලබන ඔහු සියල්ල අත්හැරලා ස්වේච්ඡාවෙන් ලංකාව ඩිජිටල්කරණය සඳහා මැදිහත්වීමට සූදානමින් ඉන්නවා. සතියක් දෙකක් ඇතුළත වැඩ බාර ගන්න ඔහු ලැහැස්තියි. ඩිජිටල්කරණය සඳහා අලුත් අමාත්‍යාංශයක් අපි ගොඩනඟනවා.
ඔහු ඒ අමාත්‍යංශයේ ලේකම්වරයා ලෙසත් අයි.සී.ටී. ආයතනයේ සභාපතිවරයා ලෙසත් පත්කරන්න අපි සැලසුම් කර තිබෙනවා. වසර තුන හතරක් යන විට ලංකාව කාර්යක්ෂම රාජ්‍ය සේවයක් බවට පරිවර්තනය කරනවා.”
