IPL තරගාවලියේ වැඩිම වැටුප් ලබන විස්තර විචාරකයන් 10 දෙනා අතර සුනිල් ගවස්කාර් ඉදිරි‍‍යෙන්ම සිටියි. විශේෂඥ විශ්ලේෂණයන් සහ ආකර්ෂණීය ඉංග්‍රීසි විස්තර විචාරය වෙනුවෙන් ගවස්කාර්ට ඉන්දීය රුපියල් කෝටි 4.17ක් (ශ්‍රී ලංකා රුපියල් කෝටි 14.6ක්) මෙවර IPL තරග වාරයේදී හිමි වේ.
75 හැවිරිදි සුනිල් ගවස්කාර් 1971 වසරේ සිට 1987 දක්වා වසර 16ක කාලයක් ඉන්දියාව වෙනුවෙන් ටෙස්ට් තරග 125කට, එක්දින තරග 108කට හා පළමු පෙළ තරග 348කට සහභාගිවී සිටින අත්දැකීම් බහුලම පුද්ගලයා වන අතර, ඔහුගේ භාෂා හැසිරවීමද සිත් ඇදගන්නා සුලු වේ.
ක්‍රීඩකයන් IPL තුළින් රුපියල් කෝටි ගණනක් උපයන විට විස්තර විචාරකයෝ ඔවුන්ගේ හඬ සහ විශේෂඥතාව උපයෝගි කොට සැලකිය යුතු මුදලක් උපයති.
අනෙකුත් ඉහළ වැටුප් ලබන ඉංග්‍රීසි විචාරකයන් අතර ඔස්ට්‍රේලියාවේ මැතිව් හේඩන්, එංගලන්තයේ කෙවින් පීටර්සන් සහ බටහිර ඉන්දීය කොදෙව්හි ඉයන් බිෂොප් ද වෙති. ඔවුන් එක් IPL තරග වාරයකදී ඉන්දීය රුපියල් කෝටි 4.15ක් (ශ්‍රී ලංකා රුපියල් කෝටි 14.5ක්) උපයති. හර්ෂ බෝග්ලේ වාරයකට රුපියල් කෝටි 4ක් (ශ්‍රී ලංකා රුපියල් කෝටි 14ක්) උපයන අතර රවි ශාස්ත්‍රි ද වාරයකදී ඒ හා සමාන මුදලක් අය කරනු ලබයි.
හින්දි විස්තර විචාරක මණ්ඩලයේ සිටින, ආකාෂ් චොප්රා එක් IPL තරග වාරයකට රුපියල් කෝටි 2.92ක් (ශ්‍රී ලංකා රුපියල් කෝටි 10.25ක්) උපයයි. සංජේ මන්ජ්‍රේකර් වාරයකට රුපියල් කෝටි 2.80ක් (ශ්‍රී ලංකා රුපියල් කෝටි 9.83ක්), සුරේෂ් රයිනා වාරයකට රුපියල් කෝටි 2.5ක් (ශ්‍රී ලංකා රුපියල් කෝටි 8.78ක්) හා හර්බජන් සිං වාරයකට රුපියල් කෝටි 1.5ක් (ශ්‍රී ලංකා රුපියල් කෝටි 5.27ක්) අය කරනු ලබති.
සුනිල් ගවස්කාර් අනිල් කුම්බ්ලේ සහ රවී ශාස්ත්‍රි වැනි පළපුරුදු ප්‍රවීණයන්ගේ ගැඹුරු ක්‍රිකට් දැනුම, ආකර්ෂණීය සහ විනෝදාත්මක කතා විලාසය IPL තරගාවලියේ හදවත සේ සලකනු ලබයි.
