කොට්ටාව – පිටකොටුව 138 බස් මාර්ගයට තට්ටු දෙකේ (ඩබල් ඩෙකර්) බස් රථයක් මගී ප්‍රවාහනය සඳහා ධාවනයට යොමු කිරීමේ උත්සවයක් ජාතික ජන බලවේගය කොළඹ දිස්ත්‍රික් පාර්ලිමේන්තු මන්ත්‍රී දේවානන්ද සුරවීර මහතාගේ ප්‍රධානත්වයෙන් කොට්ටාව ප්‍රධාන බස් නැවතුම් පොළ භූමියේදී ඉකුත් දා පැවත්වුණි.
මෙම බස් රථය තට්ටු දෙකකින් සමන්විත වන අතර එක්වර මගීන් 77 දෙනකුට ගමන් කළ හැකිය
මෙම බස් රථයේ පළමු ගමන් වාරය සඳහා කොට්ටාව ප්‍රධාන බස් නැවතුම්පොළට පැමිණි අවස්ථාවේදී සහභාගි වී සිටි ආරාධිතයෝ පීත්ත පටිය කපා බස් රථයට ඇතුළු වී පොල්තෙල් පහන දල්වා ආගමික වතාවත් ඉටුකොට ප්‍රදර්ශන චාරිකාවකට එක්වූහ.
සියලු පහසුකම්වලින් සපිරි මෙම බස් රථය විනෝද චාරිකා සඳහා ද භාවිත කළ හැකි අතර මෙහි සාමාන්‍ය ගාස්තු අය කෙරේ.
බස් රථයේ හිමිකරු ජනක කුමාර ඇල්විටිගල මහතා එහිදී මෙසේ කීය.
‘‘138 බස් මාර්ගය ගත්තොත් දැඩි රථවාහන තදබදයක් තියෙන මාර්ගයක්. ඊට පිළියමක් ලෙස තමයි මම තීරණය කළේ පරිසර හිතකාමී තට්ටු දෙකේ බස් රථයක් ධාවනයට යොදවන්න. 2015 වසරේදීත් මගේ බස් රථයක් තිබුණා. මේ දෙවැනි අවස්ථාව. මම ඉල්ලා සිටිනවා අනිත් බස් රථ හිමිකරුවන්ගෙනුත් මේ විදියේ අලුත් වැඩකට අතගහලා මාර්ග තදබදය අවම කිරීමට යොමු වෙන්න කියලා.”
මෙම අවස්ථාවට මහරගම නාගරික මන්ත්‍රී ගයාන් ගමලත්, බස්නාහිර පළාත් මාර්ගස්ථ මගී ප්‍රවාහන අධිකාරියේ සභාපති විශ්‍රාමික කොමදෝරු ගාමිණී ජාසිංහ, ප්‍රාදේශීය කළමනාකරු ප්‍රසන්න කුරේ, කොට්ටාව පොලිස් ස්ථානාධිපති ප්‍රධාන පොලිස් පරීක්ෂක රොෂාන් ද සොයිසා මහතා බස් රථ හිමිකරුවන්, සේවකයෝ ඇතුළු පිරිසක් සහභාගී වී සිටියහ.
