ඉරාන දේශසීමාව ආසන්නයේ කුවේට් හි කාන්තාරයක පවත්වාගෙන ගිය ගොවිපළක රඳවාගෙන, පහරදී, ආහාර හා වැටුප් ලබා නොදී, බලහත්කාරයෙන් වැඩ කිරීමට සිදු වූ ශ්‍රී ලාංකික තරුණයන් හය දෙනෙක් කුවේට් හි ශ්‍රී ලංකා තානාපති කාර්යාලයේ නිලධාරීන් මහත් පරිශ්‍රමයක් දරා බේරාගෙන නිවෙස් වෙත යවා තිබෙනවා.
මෙම තරුණයන් ඊයේ අලුයම 03.30 ට කුවේට් සිට පැමිණි ජසීරා එයාර් වේස් ගුවන් සේවයට අයත් J-9551 දරණ ගුවන් යානයෙන් ශ්‍රී ලංකාව වෙත පැමිණ ඇති බව ශ්‍රී ලංකා විදේශ සේවා නියුක්ති කාර් යාංශයේ ආරංචි මාර්ග සඳහන් කලා.
ඔවුන් සියලු දෙනාම ත්‍රිකුණාමලයේ කින්නියා ප්‍රදේශයේ පදිංචිකරුවන් වන අතර කුවේට් හි මෙම රැකියා සඳහා ගොස් ඇත්තේ තම ගම් ප්‍රදේශයේ නීති විරෝධී තැරැව්කරුවකු මාර්ගයෙන්. ඔවුන් කුවේට්හි ෂෙයික්වරයෙකු විසින් පවත්වාගෙන යනු ලබන ගොවිපලකයි සේවය කර ඇත්තේ.
මෙම ගොවිපළේ සිට ශ්‍රී ලාංකිකයින් පිරිසක් රාත්‍රියේ කුවේට් හි ශ්‍රී ලංකා තානාපති කාර්යාලයට ලබාදුන් දුරකථන ඇමතුමකට අනුව ඔවුන් මුදාගැනීමේ මෙහෙයුම සූදානම් කර තිබුණි.
ප්‍රවේශ වීමට පාරවල් නැති දුෂ්කර කාන්තාර ප්‍රදේශයේ මෙම ගොවිපළේ රඳවා සිටි ශ්‍රී ලාංකිකයන් බේරා ගැනීම පහසු කටයුත්තක් නොවීය. කුවේට් රාජ්‍යයේ බලගතු ෂෙයික්වරයාගේ බලපෑම සහ අවට ප්‍රදේශවල ඇති දුෂ්කරතා සමඟ කටයුතු කිරීම සඳහා කුවේට්හි ඉහළම ආරක්ෂක අංශ ප්‍රධානියා වන මේජර් ජෙනරාල්වරයෙකුගේ සහාය ඇතිව විශේෂ හමුදා මෙහෙයුමක් දියත් කළ බව වාර්තා වෙනවා.
එසේම, ප්‍රධාන ආරක්ෂක නිලධාරියාගේ සහ කුවේට් රජයේ සහය ඇතිව, කණ්ඩායම ගෙදර යැවීම සඳහා ඔවුන්ගේ ගමන් ලියකියවිලි ලබා ගැනීමටද හැකි වී තිබුණා.
කුවේට් හි ශ්‍රී ලංකා තානාපති කාර්යාලයේ දෙවන රාජ්‍ය තාන්ත්‍රික නිලධාරි අබ්දුල් හලීම් සහ තෙවැනි ලේකම් ජානක සමරසේකර ද ගලවා ගැනීමේ මෙහෙයුමට සහාය වී ඇත. ඔවුන්ගෙන් ලද තොරතුරු මත ත්‍රිකුණාමලය පොලිසිය විසින් ඔවුන් එහි යැවූ නීති විරෝධී තැරැව්කරු පිළිබඳව පරීක්‍ෂණ පවත්වනවා.
