ප්‍රවීණ රංගන ශිල්පී සුමින්ද සිරිසේන මහතා අද (4) කොළඹ ජාතික රෝහලේදී අභාවප්‍රාප්ත වී ඇත.
කලා ක්ෂේත්‍රයේ 50 වසරක් පමණ විශිෂ්ඨ සේවාවක් සිදු කළ දුමින්ද සිරිසේන මහතා මියයනවිට 75 වෙනි වියෙහි පසුවූ දෙදරු පියෙකි.
වේදිකාව, සිනමාව සහ පුංචි තිරය සිය අනන්‍ය වූ රංගනයෙන් අතික්‍රමණය කළ කෘතහස්ත කලාවේදියෙකු ලෙස මෙතුමා හැඳින්විය හැකිය. අභාවප්‍රාප්ත ධම්ම ජාගොඩයන්ගේ රංග ශිල්ප ශාලිකාව හරහා රංගන ක්ෂේත්‍රයට අවතීර්ණ වූ ඔහු “මූදු පුත්තු” නාට්‍යයේ දියෝනිස්ගේ චරිතය හරහා ප්‍රසිද්ධියට පත් විය. “සිංහබාහු”, “මනමේ”, “මහාසාර” සහ “බව කඩතුරාව” වැනි සම්භාවනාවට පාත්‍ර වූ නාට්‍ය රාශියක නොමැකෙන චරිතාංග වලට ඔහු පණ පෙව්වේය.
විජය ධර්ම ශ්‍රීගේ “දුහුලු මලක්” චිත්‍රපටය හරහා සිනමාවට පිවිසි ඔහු ඉනික්බිතිව “දඬු මොනර”, “සප්ත කන්‍යා”, “සිටු කුමාරියෝ”, “යකඩ පිහාටු”, “ගිනි කිරිල්ලි, “සමනල තටු” වැනි චිත්‍රපටයන්ට රංගනයෙන් දායක විය.
“අසල්වැසියෝ” , “සිහින නිම්නය”, “හිරුට මුවාවෙන්”, “චරිත තුනක්” , “නිසල විල”, රම්‍ය සුරම්‍ය” වැනි ජනප්‍රිය ටෙලිනාට්‍ය රැසකම ඔහු සිය රංග ප්‍රභාව පෙන්නුම් කලේය.
රාජ්‍ය සම්මාන,රයිගම් ටෙලි සම්මාන, සුමති සම්මාන ඇතුළු සම්මාන ගණනාවකින් පිදුම් ලැබුවේය.
දේහය ගම්පහ , ශ්‍රී බෝධි පාර අංක 29/3 දරණ නිවසට රැගෙන ඒමට නියමිත බවත් අවසන් කටයුතු පසුව දැනුම් දෙන බවත් පවුලේ ඥාතියෙකු පැවසීය.
